RARE TUMOR SUCCESSFULLY REMOVED AT SUM SITALAPALLI CAMPUS

ସମ୍ ଶୀତଳାପଲ୍ଲୀ କ୍ୟାମ୍ପସ୍‌ରେ ସଫଳତାର ସହ ବାହାର କରାଗଲା ବିରଳ ସାଇନସ୍ ଟ୍ୟୁମର
ବ୍ରହ୍ମପୁର, ମଇ ୯: ଜଣେ ୬୦ ବର୍ଷୀୟା ମହିଳାଙ୍କର  ଶରୀରରୁ ବିରଳ ସାଇନସ୍ ଟ୍ୟୁମରକୁ ସଫଳତାର ସହ ବାହାର କରିପାରିଛନ୍ତି ଇନ୍‌ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍‌ସେସ୍ ଆଣ୍ଡ ସମ୍ ହସ୍ପିଟାଲ୍ ଶୀତଳାପଲ୍ଲୀ କ୍ୟାମ୍ପସ୍‌ର ସର୍ଜନ ।
ରୋଗୀ ଜଣଙ୍କ ଦୀର୍ଘ ବର୍ଷ ଧରି ଅତ୍ୟନ୍ତ ମୁଣ୍ଡ ବିନ୍ଧା ସହ୍ୟ କରୁଥିଲେ ଓ ତାଙ୍କର ନାସା ସମ୍ପୂର୍ଣ୍ଣ ବନ୍ଦ ହେବା ସମସ୍ୟା ନେଇ ହସ୍ପିଟାଲକୁ ଆସିଥିଲେ । କର୍ଣ୍ଣ, ନାସା ଓ ଗଳା (ଇଏନ୍‌ଟି) ବିଭାଗର ଡାକ୍ତର ପ୍ରିୟଜୀତ ପାଣିଗ୍ରାହୀ ତାଙ୍କର ପରୀକ୍ଷା ନିରୀକ୍ଷା ପରେ ସିଟି ସ୍କାନ୍ ପାଇଁ ପରାମର୍ଶ ଦେଇଥିଲେ । 
ସିଟି ସ୍କାନ୍ ରିପୋର୍ଟରୁ ନାସାର ପଛ ଭାଗରେ ଏକ ବିଶାଳ ମାସଂପିଣ୍ଡୁଳା ଥିବାର ଜଣାପଡ଼ିବା ସହ ଏହା ଖପୁରୀକୁ ଯୋଡ଼ୁ ଥିବା ରନ୍ଧ୍ରଗୁଡ଼ିକୁ ବ୍ୟାପ୍ତ ହୋଇଥିବା ଜଣାପଡ଼ିଥିଲା । 
ଡାକ୍ତର ପାଣିଗ୍ରାହୀଙ୍କ ନେତୃତ୍ୱରେ ହୋଇଥିବା ଅସ୍ତ୍ରୋପଚାର ପରେ ତାଙ୍କ ଶରୀରରୁ ସଫଳତାର ସହ ୩୦୦ ଗ୍ରାମ୍‌ର ଟ୍ୟୁମରଟିକୁ ବାହାର କରାଯାଇଥିଲା । ରୋଗୀ ଜଣକ ଏବେ ସୁସ୍ଥ ଅଛନ୍ତି । 
ଡାକ୍ତର ପାଣିଗ୍ରାହୀଙ୍କୁ ଏହି ଅସ୍ତ୍ରୋପଚାରରେ ଆନେସ୍‌ଥେସିଓଲୋଜିଷ୍ଟ ଡାକ୍ତର ଶାରଦା ପ୍ରସନ୍ନ ଦାସ, ଏଏନ୍‌ଏସ୍  ଶ୍ରୀମତି ଅର୍ଚନା ପି. ତ୍ରିପାଠୀ ଏବଂ ଅନ୍ୟ ଓଟି ଷ୍ଟାଫ୍‌ମାନେ ସହାୟତା କରିଥିଲେ । ଏଭଳି ଟ୍ୟୁମର ଖୁବ୍ ବିରଳ ବୋଲି ଡାକ୍ତର ପାଣିଗ୍ରାହୀ କହିଛନ୍ତି । 
ସମସ୍ତ ପ୍ରକାର ଅସ୍ତ୍ରୋପଚାର ଓ ଚିକିତ୍ସା ସୁବିଧା ସମ୍ ଶୀତଳାପଲ୍ଲୀ କ୍ୟାମ୍ପସ୍‌ରେ ଉପଲବ୍ଧ ବୋଲି ହସ୍ପିଟାଲ୍ ପକ୍ଷରୁ କୁହାଯାଇଛି ।